मन्त्री सवार गाडी दुर्घटना बच्चालाई जोगाउन खोज्दा

बच्चालाई जोगाउन खोज्दा लुम्बिनी प्रदेशका अर्थमन्त्री धनबहादुर मास्की सवार गाडी दुर्घटनामा परेको छ। गाडीमा सवार मन्त्रीसहित ५ जनाको अवस्था सामान्य छ। 

दंगीशरण गाउँपालिका दाङमा आयोजित कार्यक्रम सकेर लमही जाने क्रममा मन्त्री मास्की सवार गाडी दुर्घटनामा परेको हो
सोमबार अपराह्न ५ बजेतिर राप्ती लोकमार्गअन्तर्गत तुलसीपुर- १२ शीतलपुरमा दुर्घटनामा परेको मन्त्रीका प्रेस संयोजक दीपक बोहराले जानकारी दिए।  
गाडीमा मन्त्री, स्वकीय सचिव शम्भु रेग्मी, चालक मानबहादुर बंशी मगर, पिएसओ मनबहादुर चिदी र नारायण मगर सवार थिए। गाडी नहेरी बच्चाले दौडेर बाटो काट्दा उनलाई बचाउन खोज्दा दुर्घटनामा परेको हो। मन्त्री लु १ झ ७३८ नम्बरको गाडीमा सवार थिए।