इटहरी । नेकपा एमालेका अध्यक्ष तथा पुर्वप्रधानमन्त्री केपी शर्मा ओलीले इटहरीस्थित कचना बुढीगंगा महादेव माविको भवन उद्घाटन गरेका छन् ।
साढे ९ करोड लागतमा बनेको विद्यालय भवन बुधबार एक कार्यक्रमका बिच उद्घाटन गरिएको हो । कार्यक्रममा बोल्दै नेता ओलीले इटहरी र सुनसरीलाई सहयोग गर्न आफू सधै तयार रहेको बताए । ‘योजनामा राख्न, बजेट पार्नका लागि मलाई सम्झनुहोस्,’ उनले भने, ‘उद्घाटन ठूलो कुरा होइन, वडाध्यक्षले गरेपनि हुन्छ ।’
उनले सबैका लागि गुणस्तरीय शिक्षा उपलब्धताका लागि आफूले सक्दो सहयोग गर्नेसमेत बताए । ‘सरकारमा भएपनि नभएपनि म तपाईहरुलाई सहयोग गर्न सधै तयार छु,’ उनले भने ।
उनले शिक्षा विकासको लागि पुर्वाधारकले मात्र केही नहुने बताउँदै शिक्षक शिक्षिकाहरुसमेत दक्ष हुनुपर्ने विचार राखे ।
इटहरी वडा नं. ४ मा रहेको उक्त स्कुलको भवन उद्घाटन गर्ने विषयमा इटहरीका मेयर हेमकर्ण पौडेल र विद्यालय व्यवस्थापन समितिबिच विवाद चुलिएको थियो । व्यवस्थापन समितिले ओलीलाई ल्याएर उद्घाटन गर्ने निर्णय गरिरहँदा पौडेलले भने राम्रो तयारी गरेर पछि उद्घाटन गर्ने गरी तत्काललाई उद्घाटन स्थगित गरेका थिए । व्यवस्थापन समिति र नेकपा एमाले इटहरीसमितिसँग कुरा नमिलेपछि उनी उद्घाटन कार्यक्रममा उपस्थित भएनन् ।
प्रतिक्रिया दिनुहोस
कम्पनी दर्ता प्रमाणपत्र नं.: २०५७२३/७५/७६ / स्थायी लेखा नं.: ६०६५२१६७९
Copyright © 2017 / 2024 - Samayaonline.com All rights reserved