अम्बे सिमेन्टका दुई उत्पादन गुणस्तरहीन, शिवम् माथि कारवाही भएन

विराटनगर/ अम्बे सिमेन्ट उत्पादन गर्दै आएको उद्योगका दुई उत्पादन हाइटेक र अम्बे प्रिमियम ब्रान्डका दुई सिमेन्ट गुणस्तरहीन भएको पाइएपछि गुणस्तर तथा नापतौल कार्यालयले गुणस्तर चिह्न खारेज गरिदिएको छ ।
जिप्सम र क्लिंकरमात्रै प्रयोग गरेर ओपीसी सिमेन्ट उत्पादन गर्नुपर्नेमा स्ल्यागसमेत मिसावट भएको पाइएपछि गुणस्तर चिन्ह खारेज गरिएको विभागले जनाएको छ ।

विभागले गुणस्तर चिन्ह खारेजीसँगै यी दुवै ब्रान्डका सिमेन्ट बिक्रीसमेत गर्न नपाइने जनाएको छ । विभागले गुणस्तर चिह्नका लागि फेरि नयाँ प्रकृयाबाट आउनुपर्ने र थप ३ देखि ६ महिना लाग्नेसमेत उल्लेख गरेको छ ।

शिवम् सिमेन्ट पनि विभागको अनुगमनका क्रममा कमसल भेटिएको भएपनि विभागले शिवम् सिमेन्टको गुणस्तर चिह्न खारेजीको प्रकृया भने अझै बढाएको छैन । मोरङ व्यापार संघका अध्यक्ष एवं फोरम लोकतान्त्रिकबाट सभासद् बनेका पवनकुमार सारडासमेतको लगानी रहेका कारण विभागले शिवम् सिमेन्टमाथि भने कारवाही अघि बढाउन सकेको छैन ।