एम्बुस बन्दै राजमार्ग आसपासका रुख

पुर्बपश्चिम राजमार्ग आसपासमा रहेका बिभिन्न प्रजातिका रुखहरु यतिबेला एम्बुस बन्न थालेका छन । बिशेषगरी बर्खायाममा हावाहुरी र बर्षाका कारण पनि राजमार्गमा उत्तिकै जोखिम बढेर गएको छ । सामान्य हावाहुरीमा समेत यात्रुहरुले राजमार्गमा ओहोरदोहोर गर्न भगवान पुकार्नुपर्ने अबस्था सिर्जना भएको छ । राजमार्गका आसपासमा रहेका अधिकांश रुखहरु सुकेका,ढल्न आँटेका त छँदैछन त्यसमाथि रुखका हाँगाहरु राजमार्गमै तेर्सिएका र राजमार्गको साईडमा रहेको बिजुलीको मेन तारमा समेत छुने र त्यसबाट करेण्ट प्रबाह हुने गरेका कारण खतरा झनै बढेर गएको छ ।

सुनसरीको ईटहरी पुर्ब र झापाको दमक पश्चिमको क्षेत्रमा राजमार्गमा यात्रुहरुले जोखिम मोलेर हिँडनुपर्ने अबस्था सिर्जना भएको छ । राजमार्ग आसपासमा भएका पुराना रुखहरु नकाटिँदा र हाँगाहरु सडकमै रहेका कारण हावाहुरी चलेका बेला झनै खतरा हुने गरेको छ ।

शुक्रबार दिँउसो आएको हावाहुरीका कारण मोरङको सुन्दरहरैचादेखि सुनसरीको ईटहरी सम्मको क्षेत्र कुनै युद्धग्रस्त क्षेत्र भन्दा कम खतरा थिएन । राजमार्ग आसपासका रुखहरु हावाहुरलिे ढालेपछि सडक अबरुद्ध मात्र भएन । बिद्युत सेवा समेत अबरुद्ध भएको छ । सो क्षेत्रमा दर्जनौ सिसौ लगायतका रुखहरु राजमार्गमा ढलेका छन । यो पछिल्लो उदाहरण मात्र हो । राजमार्गमा हावाहुरी नचल्दा समेत रुखहरु ढलेर लाग्ने होकी भन्ने चिन्ताले यात्रुहरुलाई पिरोल्ने गरेको छ ।

राजमार्गका रुखहरुबाट खतरा भएको स्वीकार गर्छन जिल्ला बन कार्यलय मोरङका प्रमुख डा.बिनोद देवकोटा । राजमार्ग रुखहरुको खतरा बढेको र नियम संगत रुपमा प्रक्रिया पुर्याएर हटाउने समेत उनले बताएका छन । यता सेक्टर बन कार्यलय बेलबारीका प्रमुख शत्रुधनलाल देब पनि राजमार्गमा रुखहरुको खतरा बढेको स्वीकार गर्छन । उनले पनि राजमार्गका रुखहरु प्रक्रिया पुर्याएर हटाउन सकिने बताएका छन ।