१ नं. प्रदेशका कारागारमा लागूऔषध र बलात्कारका कैदी धेरै

प्रदेश १ का कारागारमा लागूऔषध र बलात्कारसम्बन्धी अपराधका कैदीबन्दी धेरै रहेको पाइएको छ। प्रदेश प्रहरी कार्यालय विराटनगरको अध्ययनले बलात्कार (जबरजस्ती करणी), बलात्कार प्रयास (जबरजस्ती करणी उद्योग) र लागूऔषध कारोबार एवं ओसारपसार सम्बन्धी अपराधका कैदीबन्दी संख्या ५३ प्रतिशत रहेको देखाएको हो।

अध्ययनअनुसार प्रदेशका १४ वटा कारागारमा जम्मा ५ हजार १ सय ४८ कैदीबन्दी रहेका छन्। यीमध्ये बलात्कार, बलात्कार प्रयास र लागूऔषधसम्बन्धी मात्रै २ हजार ७ सय ७४ कैदीबन्दी रहेको प्रदेश १ का प्रहरी प्रमुख ठाकुरप्रसाद ज्ञवालीले जानकारी दिए। उनका अनुसार बलात्कार र बलात्कार प्रयाससम्बन्धीका १ हजार ९ सय ३६ जना छन् भने लागूऔषधका ८ सय ३८ जना रहेका छन्। यस्तै अन्य अपराधसम्बन्धी २ हजार ३ सय ७४ जना कैदीबन्दी छन्।

सुनसरी, झुम्कास्थित क्षेत्रीय कारागारमा १ हजार ७ सय ३७ कैदीबन्दी छन्। लागूऔषध र बलात्कारसम्बन्धी मात्रै ९ सय ८७ जना छन्। झापा कारागारमा रहेका १ हजार १ सय ३३ मध्ये लागूऔषध र बलात्कारसम्बन्धीका ६ सय १० कैदीबन्दी छन्। इलाममा १ सय ७१ मध्ये ९४, पाँचथरमा १ सय ५५ मध्ये ५६, ताप्लेजुङमा १ सय ३१ मध्ये ४७ जना कैदीबन्दी लागूऔषध र बलात्कारसम्बन्धी रहेका छन्।

मोरङ कारागारमा रहेका ९ सय ७ मध्ये ६ सय ७४ जना लागूऔषध र बलात्कारसम्बन्धी अपराधका कैदीबन्दी छन्। धनकुटामा रहेका ६४ मध्ये ३२, उदयपुरमा २ सय २ मध्ये ९८, खोटाङमा १ सय १३ मध्ये ३३, ओखलढुंगा कारागारका ६८ मध्ये २१ जना लागूऔषध र बलात्कारसम्बन्धी कैदीबन्दी छन्। भोजपुरमा १ सय १३ मध्ये ३६, संखुवासभामा १ सय १० मध्ये ११, तेह्रथुममा ८८ मध्ये ४९ र सोलुखुम्बु कारागारमा ७५ मध्ये २६ जना कैदीबन्दी बलात्कारसम्बन्धीका छन्।