विराटनगर विमानस्थललाई अन्तर्राष्ट्रिय स्तरको बनाउने पर्यटनमन्त्रीको घोषणा

विराटनगर विमानस्थललाई अन्तर्राष्ट्रिय स्तरको विमानस्थल बनाइने भएको छ ।

सोमबार विराटनगरमा आयोजित एक कार्यक्रममा बोल्दै पर्यटन तथा नागरिक उड्डयन मन्त्री योगेश भट्टराईले विराटनगर विमानस्थलको धावन मार्ग विस्तार गरेर आगामी पाँच वर्षभित्र २ हजार ५ सय मिटरको बनाउने घोषणा गरेका हुन् ।

आफ्नो १ सय ४१ बूँदे प्रतिबद्धता पत्रमा पनि विराटनगरको विमानस्थल विस्तार गरिने उल्लेख भएको बताउँदै मन्त्री भट्टराईले प्रदेश र स्थानीय सरकारलाई साझेदार बनाइ हाल १ हजार ५ सय मिटरको धावन मार्ग भएको विमानस्थल सन् २०२५ सम्ममा २ हजार ५ सय मिटरको बनाउने बताएका हुन् ।

मध्यम स्तरको विमानस्थल निर्माण गरि एटिआर ७२ जस्ता जहाज चलाएर अन्तर्राष्ट्रिय उडान भर्न सकिन्छ । बुद्ध एयरले एटिआर ७२ बाटै भारतका विभिन्न शहरमा उडान भरिरहेको र प्रदेशको एक राजधानीबाट अन्य प्रदेशका राजधानीमा अन्तर प्रादेशिक उडान गरी हवाई सम्पर्क कायम राख्ने कार्यक्रम सरकारले बनाएको उनले जानकारी दिए ।

प्रदेश सरकारले समेत एक वर्षअघि विराटनगर विमानस्थलको धावन मार्ग ३ हजार मिटरको बनाउनु पर्ने निर्णय गरेको प्रदेश नम्बर १ का मुख्यमन्त्री शेरधन राईले जानकारी गराए ।