इटहरीको नासिर मेनपावरले राहदानी गायब गरेको आरोप

सरकारले बैदेशिक रोजगारमा जाने युवाहरुका लागि विभिन्न देशमा फ्री भिसा फ्री टिकट गर्ने निर्णय गरेको भएपनी विभिन्न मेनपावर कम्पनीहरुले त्यसको उल्लंघन गर्दै अबैधानिक तरिकाबाट पैसा असुलउपर गर्ने गरेको आरोप लागेको छ । 

इटहरीस्थित नासिर मेनपावरको शाखा कार्यालय रहेको कम्पनीले सरकारले गरेको निर्णय विपरीत पैसा असुलउपर गरेको इटहरीका समित पोखरेलले आरोप लगाएका हुन् । बाइक चालक काममा साउदी अरब जानका लागि पोखरेलले १ लाख बीस हजार रुपैँया सो मेनपावरलाई बुझाएको उनको भनाई रहेको छ । पछि सम्झौता गरे अनुसारको काम नहुने भएपछि पोखरेलले उक्त मेनपावरबाट पैसा फिर्ता मागेका थिए ।

उनले भने, ‘मैले बुझाएको पैसा त फिर्ता पाएँ तर मेरो अन्य कागजात र पासपोर्ट भने मेनपावरले दिन मानेन ।’ उनले आँफूले अहिले वैदेशिक रोजगारीका लागि जान खोजेको भएपनि मेनपावरले पासपोर्ट रोकेकाले समस्या भएको बताए । ‘

यता, मेनपावर सञ्ंचालक रमेश राउतले आँफूहरुले पोखरेललाई पासपोर्ट लिन बोलाएको तर लिन नआएको बताए । धेरै पटक मेनपावरको कार्यालय धाएपनि पासपोर्ट कहिले काठमाडौं त कहिले धरान त कहिले बिराटनगरमा छ भनेर झुक्याउने गरेको पोखरेलको भनाई छ ।