टर्की र ग्रिस पठाउने भन्दै ठगी गर्ने मोरङका एक पक्राउ

मोरङको बुधबारेका एक जना वैदेशिक रोजगारीको लागि टर्की र ग्रिस पठाउने भन्दै ठगी गरेको आरोपमा पक्राउ परेका छन् । टर्की र ग्रिस पठाइदिन्छु भनी लाखौँ ठगी गर्ने मोरङ बुधबारे घर भई काठमाडौँको चुच्चेपाटी बस्ने कमलप्रसाद पोखरेल पक्राउ परेका हुन् ।

उनले आकर्षक तलबको लोभ देखाउँदै ३२ जनाबाट पैसा उठाएर भागेको महानगरीय अपराध नियन्त्रण महाशाखाले जनाएको छ । उनले विभिन्न समयमा ३२ जनाको ३९ लाख ५६ हजार ठगी गरेको महाशाखाका प्रहरी उपरीक्षक मुकेशकुमार सिंहले जानकारी दिए ।

पैसा लिएर फरार भएका उनलाई महाशाखाको टोलीले काठमाडौँको टेकुबाट पक्राउ गरेको थियो ।

आवश्यक अनुसन्धानपछि उनलाई थप कारवाहीका लागि आज वैदेशिक रोजगार विभागमा बुझाइएको महाशाखाले जनाएको छ ।

उनीविरुद्ध गोपीराम पराजुलीले माग १२ गते ठगीको उजुरी दिएको र सोही उजुरीका आधारमा उनलाई पक्राउ गरिएको महाशाखाले जनाएको छ ।