बलात्कार आरोपी सिद्धबाबा कारागार चलान

बलात्कार आरोप लागेका सिद्धबाबा भनिने कृष्णबहादुर गिरीलाई झुम्का कारागार ल्याइएको छ । मंगलबार सुनसरी अदालतमा उपस्थित भएका उनलाई कारागार पुर्‍याएको सुनसरी प्रहरी प्रमुख यज्ञविनोद पोख्रेलले जानकारी दिए ।

माघ ९ गते उच्च अदालत विराटनगरले उनलाई थुनामा राखेर अनुसन्धान गर्न आदेश दिएको थियो । आदेश आउनु केही घण्टा अघि नै उनी सुरक्षा गार्ड र गाडी विराटनगरमा छाडेर जोगबनी नाका हुँदै भारत लागेका थिए । 

उनी भारततर्फ भागेको चर्चा चलेको थियो । तर, उनका अनुयायीहरुले भने उपचार गराउनका लागि भारत पुगेको बताउँदै आएका थिए । अदालत आइपुगेका उनले आफू उपचारको लागि भारत गएको बेलामा अदालतले निर्णय गरेको बताए । उनले आफू निर्दोष रहेको बताउँदै आएका छन्।

उच्च अदालतको आदेशअघि १६ मंसिरमा जिल्ला अदालत सुनसरीले उनलाई तीन लाख रुपैयाँ धरौटीमा छाड्न आदेश दिएको दिएको थियो । जिल्लाको आदेश चित्त नबुझेको भन्दै सरकारी वकिल कार्यालय उच्च अदालत, बिराटनगर पुगेको थियो। कृष्णदासमाथि आफ्नै आश्रममा अनुयायी करणी गरेको आरोप लागेको छ ।