रुपन्देहीमा कार दुर्घटना हुँदा तीनको मृत्यु, एक घाइते

रुपन्देहीमा शुक्रवार राती कार दुर्घटना हुँदा तीन जनाको मृत्यु भएको छ । एक जना घाइते भएका छन् ।  जिल्ला प्रहरी कार्यालय रुपन्देहीका अनुसार रुपन्देहीको रोहिणी गाउँपालिका वार्ड नं.४ छिपागढस्थित हुलाकी सडकमा कार दुर्घटना भएको हो । 

परासीवाट भैरहवातर्फ आउँदै गरेको लु.२ च.६७५६ नं.को कार आफै अनियन्त्रित भई सडकदेखि १० मिटर उत्तर साईडमा पल्टन जाँदा कारमा सवार तीन जनाको मृत्यु भएको जिल्ला प्रहरी कार्यालयका प्रवक्ता प्रहरी नायव उपरीक्षक खड्कवहादुर खत्रीले जानकारी दिए ।

मृत्यु हुनेहरुमा रुपन्देहीको सिद्धार्थनगर नगरपालिका वार्ड नं.-४ का २७ वर्षीय देबेन्द्र चौधरी, रुपन्देहीको कोटहीमाई गाउँपालिका वार्ड नं.-३ मर्यादपुरका २८ वर्षीय  नौसाद दर्जी र नवलपरासीको रामग्राम नगरपालिका वार्ड नं.-१२ पथगावाका १२ वर्षीय प्रदिप ठाकुर रहेको प्रहरीले जानकारी दिएको छ ।

दुर्घटनामा परी गम्भीर घाइते भएका ४ जनालाई उपचारको लागी भीम अस्पताल भैरहवा लगिएको थियाे । जसमध्ये ३ जनाको उपचारका क्रममा मृत्यु भएको प्रहरीले जनाएको छ ।

दुर्घटनामा परी रुपन्देहीको ओमसतिया गाउँपालिका वार्ड नं.-४ बालापुरका ३४ वर्षीय अनिल यादव घाइते भएका छन् । उनको मेडिकल कलेज भैरहवामा उपचार भईरहेको प्रहरीले जनाएको छ । उनको अवस्था सामान्य रहेको प्रहरीको भनाई छ ।