हिउँमा फसेका बाबु–छोरा छ दिन पछि घर फर्किए ...

ताप्लेजुङ। ताप्लेजुङमा छ दिनअघि हिउँमा फसेका बाबु–छोरा आफैँ घर फर्किएका छन् । मिक्वाखोला गाउँपालिका–५, पापुङको लोदेनका ५५ वर्षीय लाक्पाटाँसी र उनका १४ वर्षीय छोरा पासाङ शेर्पा सोमबार घर फर्किएको ताप्लेजुङका प्रमुख जिल्ला अधिकारी उमेश पाण्डेले बताए ।

उनीहरू गत बुधबारदेखि हिउँमा फसेका थिए । उनीहरू हिउँमा फसेको सूचना शुक्रबार पाएपछि शनिबार र आइतबार उद्धार प्रयास भएको थियोे । अल्टिच्युट एयरको हेलिकप्टर उद्धारका लागि उनीहरू फसेको क्षेत्रमा पटकपटक पुगेपनि ठाउँ पहिचान गर्न नसकेपछि उद्धार हुन सकेको थिएन । 

हिउँ पर्न रोकिएको र जमेको हिउँ पनि बिस्तारै बग्दै गएपछि बाबु–छोरा आफैँ गाउँ फर्किका हुन् । चौँरी गोठ सार्ने क्रममा उनीहरूलाई हिउँले बगाएको थियोे । संयोगले ओडारमा अल्झिएर उनीहरूको ज्यान बचेको थियो ।

हिउँमा फसेर गाउँ फर्किएका  बाबु–छोराको स्वास्थ्य अवस्था सामान्य रहेको प्रजिअ पाण्डेले बताए । समुद्र सतहदेखि चार हजार मिटर उचाईमा रहेको ठाउँमा उनीहरू हिउँमा फसेका थिए ।