तराईका जिल्लामा चिसो बढ्यो, पहाडमा मौसम खुल्दै

इटहरी ।  झापालगायत तराईका जिल्लामा चिसो ह्वात्तै बढेको छ । आइतबारदेखि बढेको चिसो मङ्गलबारसम्म आइपुग्दा पनि उस्तै रहेपछि जनजीवन प्रभावित भएको छ । 

तराईका अधिकतर जिल्लामा अहिले शीतलहरको असर परिरहेको छ । बिहानैदेखि हुस्सु लागेको छ । बिहान ७ बजिसक्दा पनि सय मिटर परसम्म देख्न कठिन भएको स्थानीयले बताएका छन् । 

बिहान सञ्चालन हुने शिक्षण संस्था सञ्चालनमा समस्या भएको छ । सडकमा सवारी साधन गुड्न निकै समस्या परिरहेको छ । मौसम प्रतिकूलताकै कारण हिजोदेखि सवारीका साधन कम सङ्ख्यमा गुडेका छन् । सडक स्पष्ट नदेखिँदा सवारीका साधन दुर्घटनाको जोखिम बढेको छ । 

बालबालिका र ज्येष्ठ नागरिक चिसोको मारमा परेका छन् । चिसोले  मानव स्वास्थ्यमा समस्या थपिने सम्भावना बढेको छ।इलामसहित पहाडी जिल्लामा भने दुई दिनयता मौसम खुलेको छ । बिहानदेखि साँझसम्म घाम लागेको छ भने राति चिसो बढ्दै छ ।