आगामी निर्वाचनमा उपमेयर महिलालाई मेयरमा टिकट दिनुपर्ने माग

विराटनगर । नेपाल दलित संघका केन्द्रिय अध्यक्ष मिनबहादुर विश्वकर्माले स्थानीय तहको आगामी निर्वाचनमा पहिले निर्वाचित भएका महिलाहरूलाई नै नेतृत्व विकास गर्न राजनीतिक दलहरुले अवसर प्रदान गर्नुपर्नेमा जोड दिएका छन् ।

विराटनगरमा लैंगिक समानता र स्थानीय तहमा महिला जनप्रतिनिधिहरुको भूमिका र अधिकारबारे बोल्दै पूर्वमन्त्री तथा संबिधानका मस्यौदार समेत रहेका दलित संघका अध्यक्ष विश्वकर्माले पहिलो पटक निर्वाचित भएका महिलाहरुलाई पुनः अवसर दिएमात्र उनीहरुको नेतृत्व दिगो रूपमा विकास हुनसक्ने बताए ।

विश्वकर्माले आगामी निर्वाचनमा भागवण्डा र अवसरको बहानामा नयाँलाई मात्र अवसर दिएर पुरानालाई पाखा लगाए महिलाको नेतृत्व विकास पनि नहुने र लैङ्गिक समानता पनि आउन नसक्ने बताए । उनले दलहरुले टिकट दिँदा सदस्य रहेका महिलालाई वडा अध्यक्षमा र उपमेयर रहेका महिलालाई मेयर बनाउनु पर्नेमा जोड दिए ।

नेकपा एमाले प्रदेश १ का अध्यक्ष तथा प्रदेश सांसद तुलसी न्यौपानेले दिगो विकासको लक्ष्य हासिल गर्नका लागि समाजमा लैङ्गिक असमानता अन्त्य गराउन जरुरी भएको र त्यो महिलाहरु नेतृत्व तहमा पुगेपछि मात्र सम्भव हुने बताए । उनले आगामी निर्वाचनमा पुरानालाई माथि लगेर तल नयाँलाई महिलालाई अवसर दिनुपर्नेमा जोड दिए । बेलवारी नगरपालिका प्रमुख ज्ञानेन्द्र सुबेदीले महिलाको नेतृत्व विकास गर्दै समाजमा लैङ्गिक समानता ल्याउन राजनीतिक दलहरुले टिकट वितरण गर्दा विभेदकारी बन्न नहुनेमा जोड दिए ।

सुशासन विज्ञ डा संग्रामसिँह लामाले महिलाहरुको नेतृत्व निर्णायक तहसम्म नपुगेसम्म लैङ्गिक समानता नारामा मात्र सीमित हुने भएकोले आगामी निर्वाचनमा महिलाहरुलाई निर्णायक तहमा लान दलहरु जिम्मेवार हुनुपर्ने बताए ।

ग्रामथान गाउँपालिका उपप्रमुख फुलकुमारी चौधरीले पहिलो पटक निर्वाचित भएका जनप्रतिनिधिमा पहिले भन्दा धेरै सचेतना आइसकेकोले आगामी निर्वाचनमा अवसर पाए अझै प्रभावकारी ढंगले काम गर्न सक्ने बताइन् । उनले कानुन नै बनाएर महिलाहरुलाई प्रत्येक पालिका दुई वटा वडामा अध्यक्ष बनाउनुपर्नेमा जोड दिइन । स्विस विकास सहयोग परियोजना अधिकृत श्रद्धा रायमाझीले निर्वाचित महिलाहरुलाई निर्णायक तहमा पुर्याउन दलित महिला केन्द्र नेपालसँग मिलेर नेतृत्व विकास कार्यक्रमहरु संञ्चालन गरिरहेको जानकारी गराइन ।

दलित महिला केन्द्र नेपालका कार्यकारी निर्देशक तेजेन्द्र लामाका अनुसार निर्वाचित महिलाहरुको सशक्तीकरणका लागि सि लिडर्स कार्यक्रम देशका ३५ जिल्लामा सञ्चालन गरिरहेको जानकारी दिए । उनका अनुसार सि लिडर्स कार्यक्रम अन्र्तगत १० वटा परियोजना सञ्चालन भइरहेका छन् । जसमा दुई वर्षदेखि १२ सय बढी वडा सदस्य महिला आवद्ध भएर चरणबद्ध रूपमा नेतृत्व विकास प्रशिक्षणमा सहभागी भइरहेका छन् ।