आजको मौसम : तराइमा शितलहर , कतै आंशिक र पूर्ण बदली

इटहरी । आज (बिहीबार) देशभर आंशिक बदली रहने छ । हाल देशभर प्रभाव पारिरहेको पश्चिमी वायुका कारण आज पनि वर्षा र हिमपातको सम्भावना छ । 

मौसम पूर्वानुमान महाशाखाका अनुसार देशका अधिकांश भू–भागमा अहिले बिहान आंशिकदेखि सामान्य बदली रहेको छ । सुदूरपश्चिम, कर्णाली, गण्डकी, लुम्बिनी तथा वाग्मती प्रदेशमा सामान्यदेखि पूर्ण बदली भएको छ । 

पश्चिमी जिल्लाहरूका उच्च पहाडमा हल्का वर्षा र हिमपात हुनेछ । मध्यतराईका जिल्लामा बिहानैदेखि बाक्लो हुस्सु/कुहिरो लागेको छ । दिउँसो देशभर आंशिक बदली, वर्षा, हिमपात र चिसो अत्यधिक हुने महाशाखाले जनाएको छ । चिसोबाट जोगिन सतर्क रहन पनि महाशाखाले आग्रह गरेको छ । 

भरे राति देशभर आंशिकदेखि सामान्य बदली रहने छ । देशका पहाडी तथा तराइका थोरै भू–भागमा हल्का वर्षाको साथै उच्च पहाडी तथा हिमाली भू–भागका केही स्थानमा हल्का हिमपात हुनेछ ।