ड्र्यागन फ्रुटमा भेटियो कोरोना : सुपर मार्केट बन्द, क्वारेन्टिन बस्न निर्देशन

काठमाडौं । ड्र्यागन फ्रुटमा कोरोना भाइरस भेटिएपछि केही चिनियाँ सहरहरूले आयातित खानेकुराहरूको चेक जाँच सुरु गरेका छन् भने ड्र्यागन फ्रुट किनेकाहरूलाई क्वारेन्टिन बस्न निर्देशन दिएको छ ।

खानाबाट कोभिड १९ सर्छ भन्ने प्रमाण भने यथेष्ट छैन । तर, चीनको झेजियाङ र जियाङ्सी प्रान्तका कम्तीमा नौ सहरहरूले डिसेम्बरदेखि भियतनाम र थाइल्यान्डबाट आयात गरेका ड्र्यागन फ्रुटमा कोरोना भाइरस भेटेको दाबी गरेका छन् ।

यसले ती सहरहरूका सुपर मार्केटहरू अस्थायी रूपमा बन्द गरिएका छन् भने, कडा जाँच र  खास गरी भियतनामबाट ड्र्यागन फल भित्र्याउने ठाउँमा कडा नियन्त्रण गरिएको छ ।

चीनले कोरोना भाइरसविरुद्ध शून्य कोभिड केसको नीति अपनाएको छ । आउँदो महिना चीनमा सुरु हुने विन्टर ओलम्पिक अघि चीनले झनै बढी नियन्त्रणका उपायहरू अपनाइ रहेको छ ।

केही फलफूल किनेका व्यक्तिहरूमा सङ्क्रमण पुष्टि भएको छ भने, त्यहाँका हजार बढी नागरिकहरूलाई क्वारेनटिन बस्न स्थानीय सरकारले निर्देशन दिएको छ ।

विश्व स्वास्थ्य सङ्गठन (डब्ल्यूएचओ)का अनुसार भाइरस रहेको सतहलाई छुँदा सङ्क्रमण हुनसक्ने भए पनि खानाबाट कोरोना भाइरस सर्ने प्रमाणित भने भएको छैन ।