क्यामरुनको रङ्गशालामा भागदौड हुँदा ६ जनाको मृत्यु

एजेन्सी । ३३औँ संस्करणको अफ्रिका कप अफ नेसन्स आयोजना भइरहेको क्यामरुनमा रङ्गशालामा भागदौड हुँदा ६ जनाको मृत्यु भएको छ । 

राजधानी सहर याओन्डेलको एउटा रङ्गशालामा भएको भागदौडमा ६ जनाको मृत्यु हुनुका साथै एक दर्जनभन्दा बढी घाइते भएको क्यामरुनको सरकारी टेलिभिजनले जनाएको छ । 

क्यामरुनको सरकारी सञ्चार माध्यम सिआरटीभीले सोमबार अफ्रिका कप अफ नेसन्स म्याच हुनुअगाडि सो भागदौड भएको जनाएको छ । ओलेम्बी रङ्गशालको प्रवेशद्वारमा सो भागदौड हुँदा सो दुखद घटना भएको हो ।

क्यामरुन र कोमोरोसबीचको खेलअगाडि भागदाैड भएको बताइएको छ । भागदाैडपछि पनि खेल खेलाइएको थियो, अन्तिम १६ को सो खेलमा कोमोरोसमाथि २–१ गोलको जित निकाल्दै क्यामरुन क्वार्टरफाइनलमा पुग्यो । 

क्यामरुनको जितमा कार्ल टोको एकाम्बी र भिसेन्ट अबौबाकरले एक–एक गोल गरे । कोमोरोसका युसफ एम चङ्गामाले एक गोल गरेका थिए । 

यता, अफ्रिकन फुटबल महासङ्घले घटनाप्रति चासो देखाएको छ । घटनाबारे क्यामरुन प्रहरीले अनुसन्धान सुरु गरेको छ ।