देउवा, ओली र प्रचण्डलाई अमेरिकी सहायक विदेशमन्त्रीको फोन, एमसिसी अनुमोदन गर्न दबाब

काठमाडाैं । अमेरिकी सहायक विदेशमन्त्री डोनाल्ड लुले मिलेनियम च्यालेन्ज कर्पाेरेसन (एमसिसी) अनुमोदन गर्न शीर्षनेताहरूलाई दबाब दिएका छन् ।

आज (बिहीबार) साँझ टेलिफोन गरी उनले प्रधानमन्त्री शेरबहादुर देउवा, प्रमुख प्रतिपक्षी नेपाल कम्युनिस्ट पार्टी (एमाले) अध्यक्ष केपी शर्मा ओली र नेकपा (माओवादी केन्द्र) अध्यक्ष पुष्पकमल दाहाल प्रचण्डलाई फोन गरेका हुन्  । 

सहायक विदेशमन्त्री लुले संसद्बाट एमसिसी पारित नगरे नेपालसँगको सम्बन्धबारे समीक्षा गर्ने चेतावनीसमेत दिएको स्रोतले जनाएको छ । उनले प्रधानमन्त्री देउवालाई कुनै ढिलाइ नगरी संसद्बाट एमसिसी पारित गर्न दबाब दिएको बालुवाटार स्रोतले बताएको छ । काङ्ग्रेस प्रवक्ता प्रकाशशरण महतले अमेरिकी विदेशमन्त्री लुले देउवालाई फोन गरी एमसिसी पारित गर्न भनेको पुष्टि गरेका छन् ।

२८ फेब्रुअरीसम्ममा संसद्ले एमसिसी अनुमोदन नगरे नेपालसँगको सम्बन्ध पुनरावलोकन गर्ने लुलेले बताएका थिए । एमाले विदेश विभाग प्रमुख राजन भट्टराईले लुले एमाले अध्यक्ष ओलीलाई एमसिसी पारित गर्न भनेको जानकारी दिए । ओलीले भने कुनै एक–दुई विषयले दुई देशबीचको सम्बन्ध तल–माथि नहुने जबाफ लिएको भट्टराईले बताए ।

विदेशमन्त्री लुले नेपालका शीर्षनेतालाई एमसिसी पारित नभए चीनले त्यसमा हस्तक्षेप गरेको अर्थ लाग्नेसमेत बताएको जनाइएको छ । एमसिसी सम्झौता प्रतिनिधिसभामा विचाराधीन छ । यही माघ २३ मा एमसिसीले प्रधानमन्त्री देउवा र माओवादी केन्द्र अध्यक्ष प्रचण्डलाई पत्र लेखेर एमसिसीबारे निर्णय गर्न फागुन १६ सम्मको म्याद दिएको छ । यो भाकापछि एमसिसीको विषय दलहरूबीच पेचिलो बनिरहेको छ । 

गत असोज १३ मा देउवा र प्रचण्डले एमसिसी अनुमोदनका लागि वातावरण बनाउन चार–पाँच महिनाको समय मागेर एमसिसीलाई पत्र पठाएका थिए । त्यो पत्रको विषयले माओवादी अध्यक्ष प्रचण्डलाई बढी विवादमा तानेको छ । उनले एमसिसी पारित गर्न आफूहरूले पहल गर्ने पत्र लेखेको तर यता भने एमसिसी संशोधनबिना पारित नहुने बताइरहेकाले उनले द्वैध चरित्र देखाएको चर्चा चलिरहेको छ ।