धरान एक्स्पोको सम्पूर्ण तयारी पुरा

एक्स्पोको लागी आवश्यक सम्पूर्ण भौतिक संरचनाहरू तयारी भइरहेको एक्पो संयोजक गोपाल श्रेष्ठले जानकारी दिए। श्रेष्ठका अनुसार  सॅाझ सम्म १२३ मध्ये हालसम्म ११५ वटा स्टल बुकिङ भइसकेको छ । साथै दैनिक २० जना सशस्त्र प्रहरी बल,१० जना नेपाल प्रहरी,२० जना निजी सेक्युरिटी गार्डले सुरक्षा प्रदान गर्ने व्यवस्था मिलाएको सङ्घले जनाएको छ । महोत्सवमा सुरक्षाका लागि सिसिटिभी जडान गरिएको आयोजकको भनाई छ । ३० हजार बढिले दैनिक अवलोकन गर्छन् भने एक्स्पो अवधिमा १० करोडको कारोबार हुने लक्ष्य रहेकाले र यस अवधिमा बजार पनि चलायमान हुनाले महोत्सवमा खरिद बिक्री हुनाले  धरानको सुस्ताएको व्यापार पुनः जाग्ने आयोजकको भनाई छ । 

एक्स्पोमा नेपालका उत्पादनहरूको मात्र नभै भारत, बङ्गलादेश र पाकिस्तानबाट पनि स्टल राखिने सङ्घका अध्यक्ष विजय श्रेष्ठले जानकारी दिए । यस्तै, पहिला पटक धरानमा डोम (ह्याङ्गर) को प्रयोग गरेर स्टल राखिनेछ । डोम भित्र ७० वटा स्टल हुनेछ भने बाहिर थप ७० वटा स्टल हुनेछ । डोममा स्टल राख्दा हावा, पानी, हुरी बतासले पनि कुनै नोक्सानी नहुने भएकोले सुरक्षित हुने अध्यक्ष श्रेष्ठले बताए ।

एक्सोमा कृषि उत्पादन, कृषि औजार, घरेलु तथा साना उद्योगका उत्पादन, गाडी, बैङ्क तथा वित्तीय, रेडिमेड तथा कपडा, घरेलु सामानहरूको स्टल रहने स्टल व्यवस्थापन संयोजक विष्णु बरालले जानकारी दिए । यो एक्स्पो व्यापार गर्न नभै उत्पादन तथा व्यापारको प्रवर्द्धन गर्न आयोजना गरिएको पनि उनले बताए । एक्स्पोमा हरेक साँझ मनोरञ्जनात्मक साङ्गीतिक कार्यक्रम पनि आयोजना हुनेछ । राष्ट्रिय स्तरको कलाकारहरूको प्रस्तुति रहने भएकोले बेलुकी भने १ बजेदेखि टिकट (शुल्क) ५० रहने छ भने ४ बजेदेखि टिकट १ सय रुपैयाँ लाग्ने पनि आयोजकले जनाएको छ ।

एक्स्पोमा मोरङ, झापा, इलाम, उदयपुर, धनकुटा, तेह्रथुम, सङ्खुवासभा र भोजपुरलगायतका जिल्लाहरूबाट मानिसहरू अवलोकन तथा व्यापार गर्न आउने पनि उनको भनाई छ । साथै उनठले धरानको सुस्ताएको बजारलाई सक्रिय बनाउने पनि अपेक्षा गरिएको बताए ।

सङ्घका अध्यक्ष विजय श्रेष्ठका अनुसार एक्स्पो अवधिमा विभिन्न गोष्ठीहरू पनि आयोजना हुनेछ । बेरोजगारहरूलाई स्वरोजगार बनाउन फागुन १३ गते स्वरोजगार गोष्ठी गरिने उनले बताए । उक्त गोष्ठीमा प्रत्येक वडाबाट एक महिला र एक पुरुषलाई सहभागी गराइनेछ । गोष्ठीमा सानो लगानीमा व्यवसाय कसरी गर्ने र व्यापार, व्यवसाय कसरी अघि बढाउने भनेर प्रशिक्षण दिइने पनि उनले बताए । यस्तै, धरानका होटेल, ट्याम्पो, बस व्यवसायीहरूलाई समेत समेटेर पर्यटन गोष्ठी पनि गरिने अध्यक्ष श्रेष्ठले जानकारी दिए । उक्त गोष्ठीमा प्रदेशभरिबाट पर्यटन व्यवसायीहरूलाई निमन्त्रणा गरेर धरानलाई पर्यटनको हब कसरी बनाउने भनेर छलफल गरिनेछ । यस्तै, धरानको खानेपानी समस्या र समाधानबारे पनि गोष्ठी गर्ने अध्यक्ष श्रेष्ठले बताए ।भोलि सॅाझ गायक समीर श्रेष्ठको प्रस्तुति रहने छ । 

पानमारा ,चतरा, वराहक्षेत्र र अरुण पेट्रोल पम्ममा  निःशुल्क धरान एक्पो आउने गाडी पाइने आयोजकको भनाई छ । भोलि महोत्सवमा रक्तदान कार्यक्रम साथै स्वास्थ्य शिविर समेत हुनेछ।