इटहरीमा पहिलो पटक कर्पोरेट क्रिकेट फेस्टिभल हुने

इटहरी : व्यवसायीहरू बिच भाइचारा अभिवृद्धि गर्ने उद्देश्यका साथ इटहरीमा पहिलो पटक कर्पोरेट क्रिकेट फेस्टिभल हुने भएको छ । जिल्ला होटेल तथा पर्यटन व्यवसायी सङ्घ सुनसरीको आयोजनामा ‘पहिलो कर्पोरेट क्रिकेट फेस्टिभल २०८०’ हुन लागेको हो ।

‘खेलकुद सँगै स्वास्थ्य र पर्यटन’ नारा दिइएको फेस्टिभलमा रोटरी क्लब अफ इटहरी युगल सहआयोजक रहेको छ । आरती स्ट्रीप्स प्रालि मुख्य प्रायोजक र एक्सपर्ट एजुकेसन एण्ड भिजा सर्भिसेज सह प्रायोजक छन् ।

नेपाल डिभिएम स्कुलको मैदानमा आगामी शुक्रवार र शनिवार बिहान ७ बजेदेखि साँझ ५ बजेसम्म हुने प्रतियोगिताको कुल लागत ६ लाख अनुमान गरिएको छ । प्रतियोगिताको विजेताले २५ हजार र उपविजेताले १५ हजार नगद सहित दुवै टिमले सिल्ड, मेडल र प्रमाणपत्र पाउने भएका छन् ।

पछिल्लो समय क्रिकेटमा आम जनताको आकर्षण बढ्दै गएपछि प्रतियोगिता गर्न लागिएको सङ्घका महासचिव सफल पौडेलले बताए । उनका अनुसार फेस्टिभलको संरक्षक इटहरी उपमहानगरपालिकाले छ भने उद्योग वाणिज्य सङ्घ इटहरीले प्रवर्द्धनको जिम्मा लिएको छ । उद्योग वाणिज्य सङ्घ, नेपाल युवा उद्यमी मञ्च सुनसरी लगायत विभिन्न १६ वटा व्यवसायीक संस्थाको सहभागिता रहने उनको भनाइ छ ।

सङ्घका अध्यक्ष तेजबहादुर पुरीले विगतमा पनि विभिन्न रचनात्मक कार्यक्रम गरिरहेकाले यस पटक क्रिकेट मार्फत भाइचारा अभिवृद्धि गर्न लागिएको बताए । उनका अनुसार यस अघि परम्परागत खाना महोत्सव, ब्लड डोनेसन लगायत कार्यक्रम भएका थिए । खेलकुदको कारण पर्यटन प्रवर्द्धन गर्ने उद्देश्यका साथ कार्यक्रमलाई प्रभावकारी बनाइने उनको भनाइ छ ।