बचतकर्ताको पैसा फिर्ता गर्न नसकेपछि ९ वटा सहकारी समस्याग्रस्त घोषित

–बचतकर्ताको पैसा फिर्ता गर्न नसकेको भन्दै सरकारले नौ वटा सहकारीलाई समस्याग्रस्त घोषणा गरेको छ । कृषि, भूमि व्यवस्था तथा सहकारी मन्त्रालयले नौ वटा सहकारीलाई समस्याग्रस्तको सूचीमा राखेको हो । यसअघि एउटा सहकारीलाई समस्याग्रस्त घोषणा गरिएको थियो । यो सँगै समस्याग्रस्त सहकारीको संख्या १० वटा पुगेको छ । 

समस्याग्रस्त संस्थामा चार्टड बचत तथा सहकारी सँस्था, प्यासिफिक, कन्जुमर, प्रभु, भेगास, कुँवेर, स्टाण्डर्ड, स्टाण्र्डड मल्टिपर्पोज कोअपरेटिभ छन् । यसअघि ओरियन्टल सहकारीलाई समस्याग्रस्त घोषणा गरिएको थियो । ओरियन्टलले ६ अर्ब ८६ करोड बचतकर्तालाई फिर्ता गर्न नसकेपछि समस्याग्रस्त घोषणा गरेर छानविन भइरहेको छ । 

सहकारी विभागका प्रवक्ता नारायण प्रसाद अर्यालले समस्याग्रस्त सहकारी संस्था वा संघको व्यवस्थापन समिति गठन गरेर यी नौ वटा सहकारीमा पनि छानविन थालिएको बताए । उनले नेपाल सरकारले गठन गरेको आयोगले ओरियन्टल सँगै १ सय ३० वटा सहकारीले बचतकर्ताको निक्षेप फिर्ता गर्न नसकेको देखिएकोमा अहिले ९ वटा त्यस्ता सँस्था भेटिएको उल्लेख गरे । अर्याल यी समस्याग्रस्त ९ वटा संस्थाले १ अर्ब ३९ करोड रुपैयाँ बचत फिर्ता गर्न नसक्ने अवस्थामा पुगेको बताउँछन् । 

 ओरियन्टल सहकारीको व्यवस्थापनको लागि गठन भएको पूर्व न्यायाधीश गौरी बहादुर कार्कीको संयोजकत्वका  समिति गठन गरेको थियो । सोही समितिले यी नौ वटा सहकारीको व्यवस्थापनको प्रक्रिया अगाडी बढाउनेछ ।  समितिले सम्पत्ति र दायित्व एकिन गरेर कहाँ कहाँ तरल सम्पत्ति छ सोको छानबिन गर्ने प्रवक्ता अर्यालले बताए । 

सहकारी ऐन २०७४ ले राम्रोसँग सञ्चालन हुन नसकेका सहकारी, अनुगमन गर्दा ठुलो समस्या भएको, बचत कर्ताको पैसा फिर्ता गर्न नसकेको, अनियमितता गरेको संस्थालाई मन्त्रालयले समस्याग्रस्त घोषणा गर्न सक्नेछ । यसको लागि पहिला रजिष्ट्रारले मन्त्रालयलाई सम्बन्धित संस्थाको सिफारिस गर्नुपर्छ ।  त्यही आधारमा मन्त्रालयले समस्याग्रस्त घोषणा गर्छ ।