भदौ १४ गतेबाट प्रदर्शन हुने फिल्म 'वर एण्ड वधु' युनिटको इटहरीमा पत्रकार भेटघाट

इटहरी/ यहि भदौको १४ गतेबाट प्रदर्शनको तयारीमा रहेको फिल्म ‘वर एण्ड वधु’ को इटहरीमा पत्रकार भेटघाट सम्पन्न भएको छ । फिल्म युनिटले 'वर एण्ड वधु' प्रचारप्रसारलाई कोशी प्रदेशबाट सुरु गरेको छ । झापाको विर्तामोड र सुनसरीको धरानमा पत्रकार भेटघाट गरेको फिल्म युनिटले आज इटहरी र विराटनगरमा पत्रकार भेटघाट गरेको हो । आज शुक्रवार इटहरीको इलाईट सिनेमा हलमा भएको भेटघाटमा फिल्मका निर्मात्री जानुका थापा, निर्देशक मिलन चाम्स, प्रमुख कलाकारहरू किरण केसी 'रातामकै', आँचल शर्मा, र विवेक कर्माचार्यको उपस्थिति रहेको थियो ।

पत्रकारहरू माझ बोल्दै निर्देशक मिलन चाम्सले ‘वर एण्ड वधु’ लाई एउटा उच्च स्तरको फिल्मको रूपमा चित्रण गर्दै 'यो फिल्म दिमागले हैन, मनले हेर्नुपर्ने' बताए । उनले नेपाली चलचित्र उद्योगमा नयाँ स्तरको सिर्जना गरेको बताउँदै दर्शकहरूलाई फिल्म मनले हेर्न आग्रह गरे । कार्यक्रममा प्रमुख कलाकार किरण केसी 'रातामकै' ले पनि फिल्मको प्रशंसा गर्दै 'वर एण्ड वधु एउटा विशुद्ध नेपाली फिल्म बनेको' भने । उनले निर्देशक चाम्सको नेतृत्वमा बनेको फिल्म र कलाकार आँचल शर्मा र विवेक कर्माचार्यको अभिनयको पनि तारिफ गरे । साथै, उनले सम्पूर्ण दर्शकलाई यो फिल्म हेर्न अनुरोध गरे।

यसैगरी, अभिनेता विवेक कर्माचार्यले यो फिल्मबाट आफूलाई अगाडि बढ्न मद्दत पुग्ने विश्वास व्यक्त गर्दै सबैको समर्थनको अपेक्षा गरे । उनले दर्शकहरूको साथ र समर्थनले फिल्मलाई थप उचाइमा पुर्याउनेमा विश्वास व्यक्त गरे । अभिनेत्री आँचल शर्माले पनि फिल्मको बारेमा आफ्नो विचार राख्दै 'वर एण्ड वधु एक कमर्सियल फिल्म' भएको बताईन् । जसले पूर्ण मनोरञ्जन प्रदान गर्ने उनको भनाई छ । उनका अनुसार यसमा युवापुस्ताबीच हुने उतारचढावहरूलाई प्रस्तुत गरिएको छ । त्यसैले उनलाई सबैलाई फिल्म हेर्न आग्रह गरिन् ।

यो फिल्मलाई निर्देशन मिलन चाम्सले गरेका छन् । जो नेपाली चलचित्र उद्योगमा सफल निर्देशकको रूपमा परिचित छन् भने वर एण्ड वधु'को निर्मात्री जानुका थापा हुन् । सुदिप बरालले खिचेको फिल्मलाई सम्पादन मिलन श्रेष्ठले गरेका छन् । यो फिल्ममा आँचल शर्मा, विवेक कर्माचार्य, गरिमा शर्मा, विजु पार्की, किरण केसी, सरिता लामिछाने, कुसुम शर्मा, श्रृष्टी खड्का, हिमेश पन्त, दिनेश काफ्ले, यमन श्रेष्ठ, रविन्द्र खड्का, अंशु महर्जन र सिता न्यौपाने लगायतको अभिनय रहेको छ ।