सत्ता होइन,विभत्सु थापाले सेवा : देशको भलोका लागि ‘हलो’मा भोट हाल्न आहान

धनकुटा — आगामी फागुन २१ गते हुन गइरहेको निर्वाचनलाई लक्षित गर्दै राष्ट्रिय प्रजातन्त्र पार्टी (राप्रपा) धनकुटाले युवा उम्मेदवार विभत्सु थापालाई औपचारिक रूपमा सिफारिस गरेको छ। “सत्ता होइन, सेवा” भन्ने मूल नारासहित मैदानमा उत्रिएका थापा युवामैत्री, सुशासन र स्थानीय विकासलाई आफ्नो प्रमुख एजेन्डा बनाउँदै अघि बढिरहेका छन्।
राप्रपा धनकुटा जिल्ला समितिको बैठकले थापालाई सर्वसम्मत रूपमा उम्मेदवार सिफारिस गरेपछि स्थानीय राजनीतिक वृत्तमा नयाँ ऊर्जा थपिएको छ। पार्टीले देशमा बढ्दो बेरोजगारी, युवा पलायन, भ्रष्टाचार र अस्थिर राजनीतिबाट आजित जनताका लागि नयाँ सोच र नेतृत्व आवश्यक रहेको ठहर गर्दै युवालाई अवसर दिनुपर्ने धारणा अघि सारेको छ।
युवा उम्मेदवार विभत्सु थापाले आफू पद र सत्ताको लागि होइन, सेवाको भावनाका साथ राजनीतिमा आएको स्पष्ट पारे। उनले भने, “राजनीति जनताको जीवन परिवर्तन गर्ने माध्यम हुनुपर्छ। सत्ता केन्द्रित राजनीति होइन, जनताको दुःख–सुख बुझ्ने सेवामूलक राजनीति आजको आवश्यकता हो।”
थापाले कृषि, शिक्षा, स्वास्थ्य र रोजगारीलाई प्राथमिकतामा राख्दै ‘देशको भलोमा, भोट हालौँ हलोमा’ भन्ने नारालाई व्यवहारमा उतार्ने प्रतिबद्धता जनाए। उनले कृषि आधुनिकीकरण, किसानलाई उचित मूल्य, स्थानीय उत्पादनको बजारीकरण र युवालाई स्वरोजगारमा जोड्ने योजनाहरू सार्वजनिक गरेका छन्।
धनकुटा जिल्लामा लामो समयदेखि विकासका नाममा दोहोरिएका आश्वासन मात्र दिइएको भन्दै थापाले अब परिणाम देखिने नेतृत्व आवश्यक रहेको बताए। “जनताले धेरै सहिसके। अब भाषण होइन, काम चाहिएको छ,” उनको भनाइ छ।
राप्रपाका स्थानीय नेताहरूले विभत्सु थापालाई इमानदार, ऊर्जावान र जनतासँग प्रत्यक्ष जोडिएको युवा नेताका रूपमा चित्रण गरेका छन्। पार्टीका अनुसार थापा लामो समयदेखि सामाजिक अभियान, युवा सशक्तीकरण र स्थानीय सरोकारका मुद्दामा सक्रिय रहँदै आएका छन्।
स्थानीय युवाहरू पनि थापाको उम्मेदवारीप्रति आशावादी देखिएका छन्। उनीहरू भन्छन्, “अब पुरानै अनुहार र पुरानै शैलीले देश चल्दैन। युवाले नेतृत्व लिएर नयाँ दिशा दिनुपर्छ।”
आगामी निर्वाचनलाई परिवर्तनको अवसरका रूपमा चित्रण गर्दै राप्रपाले धनकुटाका मतदातालाई हलो चिन्हमा मतदान गरेर सेवामूलक राजनीति स्थापना गर्न आह्वान गरेको छ। पार्टीको विश्वास छ— युवाको नेतृत्व, स्पष्ट दृष्टिकोण र जनमुखी सोचले धनकुटाको भविष्य उज्यालो बन्न सक्छ।