चुनावी अभियानका क्रममा स्थानीय मतदातासँग प्रत्यक्ष संवाद गर्दै सुव्वाले जनताको समस्या नजिकबाट बुझ्ने

तेह्रथुम /तेह्रथुम  — प्रतिनिधिसभा सदस्य पदका लागि नेपाली कांग्रेसका उम्मेदवार सन्तोष सुव्वाले जिल्लामा पार्टी एकताबद्ध भएर अगाडि बढिरहेको बताएका छन्। चुनावी अभियानका क्रममा तेह्रथुमका विभिन्न स्थानमा आयोजित भेटघाट तथा कोणसभा कार्यक्रममा बोल्दै उनले नेपाली कांग्रेस तेह्रथुम अहिले “एक ढिक्का” भएर जनताको पक्षमा उभिएको स्पष्ट पारे। उम्मेदवार सुव्वाका अनुसार विगतमा देखिएका आन्तरिक असहमति र मतभेदलाई समाप्त गर्दै पार्टीले साझा लक्ष्यसहित चुनावी मैदानमा होमिएको छ। “तेह्रथुम कांग्रेस आज संगठनात्मक रूपमा बलियो छ। सबै नेता, कार्यकर्ता र शुभेच्छुकहरू एउटै उद्देश्यका लागि लागिपरेका छन्,” उनले भने, “यो एकताले चुनावमा सकारात्मक परिणाम ल्याउनेमा हामी विश्वस्त छौं।”
उनले नेपाली कांग्रेस लोकतन्त्र, समावेशिता र विकासको पक्षमा सधैं अग्रपंक्तिमा रहेको पार्टी भएको उल्लेख गरे। तेह्रथुम जिल्लाको समग्र विकासका लागि आफूले स्पष्ट खाका तयार पारेको बताउँदै सुव्वाले शिक्षा, स्वास्थ्य, कृषि, पर्यटन र पूर्वाधार विकासलाई प्राथमिकतामा राखिने बताए। विशेष गरी ग्रामीण क्षेत्रका जनताको जीवनस्तर उकास्न दीर्घकालीन योजना आवश्यक रहेको उनको भनाइ थियो। चुनावी अभियानका क्रममा स्थानीय मतदातासँग प्रत्यक्ष संवाद गर्दै सुव्वाले जनताको समस्या नजिकबाट बुझ्ने प्रयास गरिरहेका छन्। किसानले भोगिरहेका मल, बीउ र बजारको समस्या, युवाहरूको रोजगारीको अभाव तथा आधारभूत स्वास्थ्य सेवाको पहुँच जस्ता विषयमा आफू गम्भीर रहेको उनले बताए। “जनताले भोगेका समस्या संसदमा पुर्‍याउनु नै मेरो मुख्य दायित्व हुनेछ,” उनले भने।नेपाली कांग्रेस तेह्रथुमका जिल्ला नेतृत्वले पनि उम्मेदवार सुव्वाको पक्षमा एकमत देखाएको छ। पार्टीका नेताहरूका अनुसार यसपटक संगठन सुदृढ बनाउँदै घरदैलो अभियान, टोलसभा र जनसंवादलाई प्रभावकारी बनाइएको छ। कांग्रेसले विगतमा गरेका काम र भावी योजनाबारे जनतालाई स्पष्ट रूपमा जानकारी गराइरहेको उनीहरूको भनाइ  स्थानीय बासिन्दाहरूले पनि कांग्रेस एकताबद्ध भएर अघि बढ्नु सकारात्मक संकेत भएको प्रतिक्रिया दिएका छन्। लामो समयदेखि विकासमा पछि परेको तेह्रथुमलाई नयाँ उचाइमा पुर्‍याउन सक्षम नेतृत्व आवश्यक रहेको उनीहरूको धारणा छ। उम्मेदवार सुव्वाले जनताको भरोसा जित्न सफल भएमा जिल्लामा विकासका नयाँ आयाम खुल्ने अपेक्षा गरिएको छ।
चुनाव नजिकिँदै जाँदा नेपाली कांग्रेस तेह्रथुमले उत्साहका साथ अभियानलाई तीव्र बनाएको छ। सन्तोष सुव्वाको नेतृत्वमा कांग्रेसले जिल्लामा आशा र भरोसाको सन्देश प्रवाह गरिरहेको छ। पार्टी एकताले चुनावी परिणाम आफ्नो पक्षमा पार्ने विश्वास कांग्रेसजनले व्यक्त गरेका छन्।