इटहरी उद्योग वाणिज्य संघको वाणिज्य सदस्यमा सिनेट रिजालको उम्मेदवारी, डिजिटल सेवामार्फत व्यवसायीको हितमा प्रतिबद्धता

इटहरी । इटहरी उद्योग वाणिज्य संघको निर्वाचन–२०८३ अन्तर्गत वाणिज्य सदस्य पदका लागि युवा व्यवसायी सिनेट रिजालले उम्मेदवारी घोषणा गरेका छन्। व्यवसायीको हकहित संरक्षण, संघको संस्थागत सुदृढीकरण तथा डिजिटल सेवाको विस्तारलाई मुख्य एजेन्डा बनाउँदै उनी चुनावी मैदानमा उत्रिएका हुन्।

रिजालले संघलाई समयानुकूल, पारदर्शी र प्रविधिमैत्री संस्थाका रूपमा विकास गर्न आफू प्रतिबद्ध रहेको बताएका छन्। उनका अनुसार संघका सेवा–सुविधालाई डिजिटल माध्यमबाट सरल, छिटो र प्रभावकारी बनाउँदै सदस्य व्यवसायीलाई सहज सेवा उपलब्ध गराउनु आवश्यक छ। यसले सेवाप्रवाहमा पारदर्शिता बढ्नुका साथै व्यवसायीको समय र लागतसमेत बचत हुने उनको विश्वास छ।

उनले व्यवसायीबीच आपसी एकता, सहकार्य र विश्वासको वातावरणलाई थप मजबुत बनाउने, व्यवसाय विस्तारका नयाँ अवसर खोज्ने तथा साझा समस्याको समाधानका लागि संघलाई प्रभावकारी रूपमा परिचालन गर्ने योजना पनि सार्वजनिक गरेका छन्। बदलिँदो व्यापारिक परिवेशअनुसार संघले नवीन सोच र प्रविधिको उपयोग गर्दै व्यवसायीको प्रतिस्पर्धात्मक क्षमता अभिवृद्धि गर्नुपर्नेमा उनले जोड दिएका छन्।

चुनावी अभियानका क्रममा “सिनेट रिजाललाई अत्यधिक मतले विजयी गराऔँ” भन्ने नारासहित उनी व्यवसायी सदस्यहरूमाझ पुगिरहेका छन्। आफ्नो उम्मेदवारी कुनै व्यक्तिगत महत्वाकांक्षा नभई सम्पूर्ण उद्योगी–व्यवसायीको साझा हितका लागि भएको उनको भनाइ छ।

आगामी निर्वाचनलाई लक्षित गर्दै विभिन्न पदका उम्मेदवारहरूले आफ्ना योजना, प्रतिबद्धता र एजेन्डा सार्वजनिक गर्दै चुनावी अभियानलाई तीव्र बनाइरहेका छन्। यसैबीच सिनेट रिजालले आफू निर्वाचित भए व्यवसायीको आवाजलाई बलियो रूपमा उठाउने, संघलाई थप आधुनिक, उत्तरदायी र प्रभावकारी संस्थाका रूपमा स्थापित गर्ने तथा व्यवसायीमैत्री वातावरण निर्माणमा सक्रिय भूमिका निर्वाह गर्ने प्रतिबद्धता व्यक्त गरेका छन्।

उनले सबै उद्योगी–व्यवसायी सदस्यसँग आफ्नो पक्षमा मतदान गरी सफल नेतृत्व निर्माणमा साथ दिन आग्रह गरेका छन्।