इटहरी १०का वडासचिव रेग्मी घुसको रकमसहित पक्राउ

जीवन फुयाल /इटहरी-सुनसरीको इटहरी उपमहानगरपालिकाको वडा नम्बर १० का सचिव विदुर रेग्मी घुसको रकमसहित रंगेहात पक्राउ परेका छन्। रेग्मीलाई सेवाग्राहीसँग घुस लिँदै गर्दा अख्तियार दुरुपगोग अनुसन्धान कार्यालयको टोलीले रङ्गेहात पक्राउ गरेको हो।

व्यवसाय सञ्चालन गर्न सिफारिस लिएबापत रेग्मीले लिएको १३ हजार रुपैयाँ सहित उनि पक्राउ परेको अख्तियारको क्षेत्रीय कार्यालय इटहरीले जनाएको छ।

रेग्मीले होटल सञ्चालन गर्ने एक सेवाग्राहीलाई घरेलु तथा साना उद्योग कार्यालयबाट व्यवसाय प्रमाणपत्र दर्ताका लागि चाहिने सिफारिश ल्याइदिने भन्दै पैसा लिएको अख्तियारको क्षेत्रीय कार्यालय इटहरीका प्रहरी निरिक्षक राजन कार्कीले बताउनुभयो। रेग्मी इटहरी– ६पश्चिम लाईनस्थित रोज रक मम हाउसबाट पक्राउ परेका हुन्।