पहिरो छिचोल्न खोज्दा त्रिशूलीको डिलमा पुगे चार यात्रु

चितवन : नारायणगढ मुग्लिन सडक खण्डमा खसेको पहिरो छिचोल्न खोज्दा चारजना घाइते भएका छन । चार किलोमा खसेको पहिरो माथि हिँडेर जान खोज्दा खसेर सात वर्षीय बालिकासहित चार महिला घाइते भएका हुन ।  

माथिबाट ढुङ्गा खसेपछि उनीहरु अत्तालिएर सडकबाट तल खसेका हुन् । सडकबाट खस्दा चितवन रत्ननगर नगरपालिका–१२ कि ४८ वर्षीया प्रमिला कोइराला र त्यही नगरपालिका–२ की सुशीला भट्टराई घाइते भएका छन् । 

उनीहरुको भरतपुर अस्पतालमाा उपचार भइरहेको छ । त्यस्तै घाइते भएका नेपालगञ्ज उपमहानगरपालिका–५ की २६ वर्षीया निशा शाह र उनकी सात वर्षीया छोरी सिम्रन शाह उपचारपछि फर्किएका छन ।

पहिरो खसेको ठाँउमा जान रोक लगाए पनि जवरजस्ती गर्दा घटना भएको जिल्ला प्रहरी कार्यालय प्रवक्ता डीएसपी प्रभुप्रसाद ढकालले बताए । पहिरो छिचोल्न खोजेका उनीहरु खसेर नदीको डिलमा अड्किएका थिए । उनीहरुलाई सुरक्षाकर्मीले डोरीको साहायताले उनीहरुको उद्धार गरेका हुन् ।