इटहरीः जनता उच्च मावि इटहरीमा अध्ययनरत विद्यार्थीहरूलाई पूर्व विद्यार्थीहरूको एक समूहले आइतबार छात्रवृत्ति प्रदान गरेको छ । विद्यालयमा अध्ययनरत कक्षा १ देखि १० सम्मका १० जना विद्यार्थीलाई प्रतिभा पुरस्कारस्वरुप छात्रावृत्ति वितरण गरिएको हो ।
२०४६ सालमा एसएलसी परीक्षा उत्तीर्ण गरेका विद्यार्थीहरूको समूहले कक्षा १ देखि १० सम्म उत्कृष्ट नतिजा ल्याउने १० जना विद्यार्थीलाई कक्षाअनुसार नगद र वितरण गरेको हो ।
१० जना विद्यार्थीलाई १ लाख १ हजार ४ सय रुपैयाँ बराबरको छात्रवृत्ति प्रदान गरिएको विद्यालयका पूर्व विद्यार्थी संजोग पराजुलीले जानकारी दिएका हुन् । विद्यालयका पूर्व विद्यर्थी तथा छात्रवृत्ति वितरण कार्यक्रमका संयोजक बाबुराम प्रधानका अनुसार कक्षा १ मा अध्ययन गर्ने विद्यार्थी रिया सहनीका लागि पूर्व विद्यार्थी शुभलक्ष्मीले ६ हजार ५ सय रुपैयाँ छात्रवृत्ति स्वरूप प्रदान गरेकी छिन् ।
त्यस्तै, कक्षा २ मा अध्ययनरत रोहन शाहलाई पूर्व विद्यार्थी शान्ति सुवेदीले ७ हजार रुपैयाँ प्रदान गरेकी छिन् । कक्षा ३ मा अध्ययन गर्ने फूलमाया तामाङलाई प्रीति खनालले ७ हजार ५ सय रुपैयाँ र कक्षा ४ का विद्यार्थी गगन शर्मालाई गणेश अधिकारीले ८ हजार १ सय रुपैयाँ प्रदान गरेका छन् ।
कार्यक्रममा कक्षा ५ का विद्यार्थी सपना दास, कक्षा ६ की विद्यार्थी स्मृति मल्लिक र कक्षा ७ का विद्यार्थी सुशान्त ढकाललाई छात्रवृत्ति दिइएको छ । उनीहरूलाई पूर्व विद्यार्थीहरू पवित्रा बजगाईं, सुदेशा बिष्ट र राकेश चौधरीले क्रमशः नगद ८ हजार ८ सय, ९ हजार ५ सय र १० हजार ३ सय रुपैयाँ प्रदान गरेका हुन् ।
कक्षा ८ का विद्यार्थी सिद्धान्त ढुङ्गेललाई पूर्व विद्यार्थी भाइसन बर्देवाले र कक्षा ९ की विद्यार्थी जेनिसा मिश्रलाई पूर्व विद्यार्थी उमेश पौडेलले क्रमशः ११ हजार २ सय र १२ हजार ५ सय रुपैयाँ प्रदान गरेका छन् ।
त्यस्तै, ०४६ सालको ब्याचका सम्पूर्ण विद्यार्थीको तर्फबाट कक्षा १० का विद्यार्थी बेगमकुमार चौधरीलाई एकमुष्ट २० हजार रुपैयाँ प्रदान गरिएको पराजुलीले बताए ।
प्रतिभा पुरस्कार स्वरूप यस वर्षदेखि दिन थालिएको छात्रवृत्ति आगामी वर्ष पनि जारी रहने पराजुलीले बताए । कार्यक्रममा पराजुलीका साथै विद्यालयको शिक्षक अभिभावक सङ्घका तर्फबाट अध्यक्ष विश्वनाथ ढकाल, विद्यालय व्यवस्थापन समितिका अध्यक्ष काशीनाथ दङ्गाल, विद्यालयका प्रधानाध्यापक छत्रपति ढुङ्गेल लगायतले बोलेका थिए ।
२०१३ सालमा स्थापना भएको सो विद्यालयमा अध्ययन गर्ने थुप्रै विद्यार्थी अहिले डाक्टर, इन्जिनियर, शिक्षक, राजनीतिज्ञ तथा व्यवसायी भएका छन् । ०४६ सालको ब्याचका विद्यार्थीहरूको मात्र एक समूह बनाएर पहिलो पटक पूर्व विद्यार्थीहरूको तर्फबाट छात्तवृत्ति प्रदान गरिएको हो । आगामी वर्षदेखि भने सोही विद्यालयबाट एसइई दिएर सोही विद्यालयमा प्लस टुमा पढ्ने मेधावी विद्यार्थीलाई पनि छात्रवृत्ति दिइने पराजुलीले बताए ।
जनता स्कुलका विद्यार्थीहरूको हितका लागि ५ लाखभन्दा बढी रुपैयाँको अक्षयकोष समेत खडा गरेको पुरस्कार वितरण कार्यक्रमका संयोजक प्रधानले बताए ।
प्रतिक्रिया दिनुहोस
कम्पनी दर्ता प्रमाणपत्र नं.: २०५७२३/७५/७६ / स्थायी लेखा नं.: ६०६५२१६७९
Copyright © 2017 / 2024 - Samayaonline.com All rights reserved