धुर्मुस सुन्तली फाउण्डेसनले निर्माण गर्ने स्टेडियमको शिलान्यास बैसाखमा

१८ देखी २२ महिनामा निर्माण सम्पन्न हुने

ई–खेलकुद संम्बाददाता । 

अन्तराष्ट्रिय स्तरको क्रिकेट मैदान निर्माण गर्ने घोषणा गरेको झण्डै १ बर्षपछि धुर्मुससुन्तली फाउण्डेशनले सो परियोजनाको निर्माण प्रक्रिया सुरु गर्ने भएको छ । आबश्यक प्रक्रिया र जग्गाको छनोट गरिसकेको फाउण्डेशनले निर्माण प्रक्रियाको तयारी सुरु गरेको हो । लर्ड बुद्ध ईटरनेशनल क्रिकेट स्टेडियम नाम दिईएको सो परियोजनाको बिस्तृत परियोजना प्रतिबेदन डिपीआरको काम अघि बढेको फाउण्डेशनका संस्थापक सिताराम कट्टेलले जानकारी दिनुभयो । यसैबर्ष भित्र डिपिआरको काम सकेर बैसाखमा सो रंगशालाको शिलान्यास हुने उहाले बताउनुभयो । 

चितवनको भरतपुरमा निर्माण गरिने रंगशाला, २० बिगाहा क्षेत्रफलमा निर्माण हुनेछ । शिलान्यास भएको १८ देखी २२ महिनामा निर्माण सम्पन्न गरी रंगशाला हस्तान्तरण गरिने कट्टेलको भनाई छ । रंगशाला निर्माणकै लागी रकम जुटाउन फाउण्डेशनले दाताहरुबाट सहयोग रकमपनि संकलन गरिरहेको छ । रंगशाला निर्माणकै लागी बिभिन्न पक्षसंग छलफलका साथै सहयोग रकम समेत जुटाउन कट्टेल बिहिबार कतार गएका छन् । 

नेपाली क्रिकेट टोलीले प्राप्त गरेको पछिल्लो सफलतालाई कायम राख्न अन्तराष्ट्रिय स्तरको रंगशाला आबश्यक रहेको निश्कर्षसहित फाउण्डेशनले त्यसको निर्माणमा जुट्ने घोषणा गरेको थियो । 

सरकारी प्रक्रिया पुरा गर्दै जग्गाको छनोट गर्न समय लागेपनि अबका कामहरु भने तिब्र गतिमा अघि बढ्ने फाउण्डेशनले जनाएको छ । झण्डै २ अर्ब लागत अनुमान गरिएको परियोजनाका लागी रकम संकलन मुख्य चुनौती रहेको छ । 

यद्यपी फाउण्डेशनले निर्माण गरेका यसअघिका परियोजनामा दाताहरुबाट पाएको साथ र सहयोग पछिल्लो परियोजनामा पनि प्राप्त हुने फाउण्डेशनको बिश्वास छ । 

बहुउपयोगी रंगशाला निर्माणको अबधारणा अनुसार क्रिकेट मैदानसंगै भलिबलकोर्ट र अन्य ईन्डोर खेलका हलहरुपनि निर्माण गर्ने फाउण्डेशनको तयारी छ । त्यसै अनुसार डिपीआर तयार पार्दै निर्माणको थालनी गर्ने कट्टेलले बताउनुभयो । 

फाउण्डेशनले यसअघि भुकम्पपिडितका लागी २ वटा बस्ती, रौतहटमा मुसहर बस्तीका साथै बिरअस्पातालको सरसफाई र रंगरोगनको काम पनि निर्धारित समयमै सम्पन्न गरेको थियो ।