लागुऔषध नियन्त्रण ब्यूरोको ‘बिशेष अप्रेसन’ इटहरी र काठमाडौबाट ५ जना पक्राउ

इटहरी । लागुऔषध नियन्त्रण ब्यूरोले इटहरी र काठमाडौबाट लागुऔषध कारोबारमा संलग्न ५ जनालाई पक्राउ गरेको छ । ब्यूरो टोलीले ठुलो परिमाणमा खैरो हेरोइन र चरेस सहित उनिहरुलाई पक्राउ गरेको हो ।

प्रहरी टोलीले कैलालीको लम्की चुहा नगरपालिका– ११ घर भएका २४ वर्षीय सुरेन्द्र शाहलाई खैरो हेरोइन ९ ग्रामसहित काठमाडौं बानेश्वरबाट पक्राउ गरेको थियो । त्यसैगरी आरए २३९ को उडानमार्फत कतारको राजधानी दोहा जान लागेका मोरङ ग्रामथान गाउँपालिका–७ बनिगाउँ बस्ने ३२ वर्षीय मानसिंह सरदार थारुको सुटकेसबाट एक किलो गाँजा प्रहरीले बरामद गरेको थियो।

उक्त गाँजा कतार पठाउने कार्यमा संलग्न सुनसरी इटहरी नगरपालिका–४ मनकामना टोल बस्ने ३३ वर्षीय विजय भन्ने हेम नारायण यादव, सोही ठाउँका ४२ वर्षीय प्रेम निरौला र सोही नगरपालिका–३ देवस्थान बस्ने ३१ वर्षीय सविन खनाललाई पनि पक्राउ गरिएको बताइएको छ ।

काठमाडौबाट शाह र थारुलाई पक्राउ गरेपछि अन्यलाई प्रक्राउ गर्न ब्युरो टोली इटहरी आएको थियो । इटहरी र मोरङबाट पक्राउ परेकाहरुलाई प्रहरीले काठमाडौ लगेको छ ।

पक्राउ परेका सबैजना लागुऔषधको लामो समयदेखि कारोबारी भएको बताइएको छ ।