चरिकोटमा हिमपात, प्रभावितमा जनजीवन

दोलखाको उच्च भूभागमा हिमपात सुरु भएको छ। जिल्लाको पर्यटकीय क्षेत्र कालिञ्चोक, कुरीबजार, खरीढुङ्गा, जिरीबजार, शैलुङडाँडा, च्योर्दुङलगायत उच्च पहाडी भागमा बिहिबारदेखि हिमपात भएको हो।

हिमपातसँगै वर्षा भई चिसो बढेका कारण जिल्लाको उच्च भागमा बसोबास गर्दै आएका तथा भूकम्पका कारण घर क्षति भई अस्थायी बसोबास गर्दै आएकाका जनजीवन प्रभावित र कष्टकर बन्दैगएको छ। हिमपात भएसँगै हिउँ खेल्नका लागि आन्तरिक पर्यटकको चहलपहलसमेत बढेको छ। काठमाडौंबाट नजिकको दूरीमा दोलखा आई हिउँसँग खेल्न बाहिरबाट पर्यटक आउने भएकाले जिल्लाको होटल व्यवसायी खुशी भएका होटल सङ्घ दोलखाका अध्यक्ष सन्तोष पाठकले बताए।

दोलखको कालिञ्चोक र कुरीबजारमा अहिले हजारौँको सङ्ख्यामा हिउँ खेल्न पर्यटक पुगेका र कुरीका सबै होटल भरिएको होटल सुनपातीका सञ्चालक हरि ओलीले बताए।

-रासस