२९ बर्षे व्यवायिक अनुभव संगालेकी ः गायत्री

आगामी असार १४ गते हुने उद्योग वाणिज्य संघ इटहरीको चुनावमा इटहरीकी महिला व्यवसायी गायत्री कटुवाल भण्डारी पनि चुनावी मैदानमा छिन् । विगत २९ बर्षदेखि आफ्नो पैतृक व्यवसायलाई निरन्तरता दिँदै आएकी गायत्री इटहरीकी परिचित व्यवसायी हुन् । व्यवसाय सँगसँगै सामाजिक कार्यमा सक्रिय भण्डारी हाल रेडिमेट व्यवसाय संघकी अध्यक्ष पनि हुन् । बिगत लामो समयदेखि आफ्नो पैतृक व्यवसायलाई निरन्तर दिँदै आएकी भण्डारी आगामी असार १४ गते हुन गैरहेको उद्योग बाणिज्य संघको निर्वाचनमा भीम पौडेल प्यानलबाट सदस्यमा उमेद्वारी दिएकी छिन् । व्यवसायका सुरुवाती दिनहरुमा संघर्षपूर्ण जीवन बिताउँदै आएकी भण्डारीमा व्यवसायमा हुने दुःख तथा सुख दुवैको बराबर अनुभूति छ । उद्योग वाणिज्य संघ इटहरीमा टंक दुलाल र स्व. सुनिल अग्रवालको पहलमा उद्योग वाणिज्य संघ इटहरीको कार्यसमितिमा महिला सदस्य भई काम गरेको अनुभव उनीमा छ । व्यवसायीको हक हितको लागि आवाज उठाउँदै आएकी भण्डारी समाजिक कार्यमा पनि उत्तिकै सक्रिय छिन् । उनकै पहलमा रेडिमेड व्यवसायी संघ इटहरीको तर्फबाट २०७४ को बुढी खोलाको बाढीको चपेटामा परेका स्थानीयहरुलाई रु. ३ लाख मूल्य बराबरको लत्ता कपडा, जुत्ता चप्पल बितरण गर्नुको साथै गतबर्ष एसके टूेडर्समा आगलागी हुँदा पीडितलाई घर बहाल बापतको तीन महिनाको रकम छुट गराउन पहल गरेको उनी बताउँछिन । धुर्मुस सुन्तली फाउन्डेसनले थालेको पूर्व मेचीदेखि पश्चिम महाकालीसम्मको सरसफाई अभियानमा आफू अग्रणी रुपमा संलग्न रहेको भण्डारी बताउँछिन् । काम सानो होस् या ठूलो हरेक क्षेत्रमा सहयोगको भावले संलग्न हुन पाउनुमा उनी गर्व गर्दछिन् । अव्यवस्थित बजारलाई व्यवस्थित गर्ने, अव्यवस्थित पार्किङ र फोहोरको उचित व्यवस्थापन गर्ने, समग्र समाजकै सुरक्षाका खातिर नगर क्षेत्रभित्र सिसी क्यामाराको विस्तार गर्न पहल गर्ने उनको मुख्य अठोट छ । अघिल्लो चुनावमा खसेका धेरै मत बदर भएका कारणले आफू पराजित हुनु परेको स्वीकार्दै आगामी चुनावमा इटहरीका उद्योगी तथा व्यवसायीहरुले अत्याधिक मतले आफूलाई बिजयी बनाउनेमा भण्डारी आशावादी छिन् ।